سارسیلماز انسان/ پروفئسور محمد تقی زهتابی وفاتی نین ایل دؤنومو

۱۳۷۷- جی ایلین دی آيي‌نين بیرینجی گونو ( 22 دسامبر 1998 ميلادي ) سه شنبه، ادبيّات سمامیزدان بیر اوُلدوز آخدی. بو اوُلدوز ائله ایشیقلی، ائله پارلاق ایدی کی، اوْنون آخماسیندان سوْنرا یئري‌نين بوشلوغونو هله ده حسّ ائدیریک!
اوْ بؤیوک انسان بوتون وارلیغی ایله یالنیز میلّتی اوچون یاشادی، اؤزو اوچون هئچ یاشامادی !
وار قوه‌سیله چالیشیردی بیر میلّتین وارلیغی اوچون، گئجه -گوندوز تانیماییردی بوچالیشمادا. وارلیق تاریخیمیزی یازدی، 7000 ایل لیک وارلیغیمیزی، اودا دوْغما دیلیمیزده !
” ایران تورکلري‌نين اسکی تاریخی” کیتابی بیر دؤنوش نقطه‌‌سی اوْلدو تاریخیمیزده. یاشاییشی اَن ساده انسانلارین یاشایشی کیمی‌ایدی. آمما بو ساده یاشایان انساندا نه قدر یوکسک‌لیک نه قدر بؤیوکلوک، نه قدر اراده، نه قدر اینام واریدی؟!
یاشي‌نين چوْخلوغونا باخمایاراق بیر گنج کیمی چالیشیردی. بیلیرم اوْنو یاشادان، اوْنو بو قدر حرکته گتیرَن چیگین‌لرینده حسّ ائتدیگی آغیر میلّي وظیفه ایدی. اوْ، میلّتي‌نين آغری‌لارینی،آجی‌لارینی،تحقیرلرینی بوتون وارلیغی ایله حسّ ائدیردی، او اؤزونه یوْخ میلّتينه یاشادی. بو سؤز بیرتعارف یوْخ بیر حقیقت، بیر گئرچک‌دیر!
بوگون، اوْنون ” ایران تورکلري‌نين اسکی تاریخی” کیتابی آرتیق بیر تَمَل کیتاب اوْلوبدور. گونو گوندن استناد ائتدیگی سندلرده داها آرتیق تثبیت‌لَشیر.
بو کیتاب آذربایجانلیلارا و ایران تورکلرینه بیر هویّت سندی اوْلدو؛ بو کیتاب چاپ اوْلدوقدا، تاریخی یالنیز آریالاردان بو طرفه ترسیم ائدَن آریا پرست شوونیست‌‌لرین یوخوسو قاریشدی.
اوْ یازدی، یاراتدی، فداکارلیق درسی وئردی و میلّتي‌نين اوره‌يینده اؤزونه ابدی یئر قازاندی!
۱۳۷۷-جی ایلین آذر آيي‌نين- 25 جی گونو سفرده اوْلدوغو آلمانیادان یئنی‌جه قاییتمیشدی، بیزده شنبه گونو آذر آيي‌نين ۲۸- جی گونو بیر تعداد ادبيّات سئورلرله تهراندا باجيسي اوغلونون ايش دفترينده قوللوغوندایدیق.
بیر آی – بیر آی یاریم آلمانیادا اوْلدوغو گونلرده اوْ اؤلکه‌ده، تورکجه تحصیل آلان دانشگاه اؤیرنجی‌لرينه کونفرانس وئرمیشدی وسوت گونو ،آذر آيي‌نين 29 – و دوكتور زهتابي آخشام، اوتوبوسلا تهراندان شبستره حركت ائتميش و دوز گونو آذر آيي نين ۳۰- جو گونو یعنی بيزله گؤروشدن یالنیز ایکی گون سوْنرا و شبستره چاتان گون، سحَر چاغي احتمالا هله ائوي‌نين گاز بوخاریسینی یاندیرمامیشدان، دونیانی وداع ائتمیشدی.!
دوکتور زهتابي‌نين اؤلوم خبری بیر گونون ایچینده بوتون شهرلره یاییلدی. سه شنبه گونو دي آيي نين بيرينجي گونو ادبيّات سئورلرین هامیسی بو آجی خبری ائشیتدی، اورکلر کؤورَلدی، گؤزلر یاشاردی!
پنجشنبه، دي آيي‌نين اوچونجو گونو تورپاغا تاپشیریلاجاغینی هامی بیلدی. تهراندان، اوُرمیه‌دن، زنجان دان، اردبیل‌دن خصوصی ایله تبریزدن بوتون ادبيّات سئوه‌رلر گلمیشدیلر.، پنجشنبه گونو و بیر گون عرضینده آنا دیلده اوُزون پارچالاردا پلاکاردلار یازیلمیشدی بو آغیر ضایعه اوُغروندا. هر شهردن، هر منطقه‌دن اورک سؤزلر سؤیله‌نیلمیشدی آذرباجانین فداکار اوْغلو حقّينده .
عظمتلي تشیع جنازه زامانی، شبستر اهالیسی اوّلده ائله تصور ائتمیشدی عراق- ایران ساواشیندا شهید اوْلانلارین مراسمی‌دیر بوگون، يالنیز یازیلان پلاکاردلار بوتونلوکله تورکجه ایدی!
اوْ گون شبستر اهالیسی بئله بیر فضانی گؤردوکده نه قدر بؤیوک بیر انسانین الدن وئرمه‌سینی یئنی‌جه باشا دوشموشدو!
آذربایجانین سارسیلماز و فداکار اوْغلو پرفسور محمد تقی زهتابی، پنجشنبه دی آي‌نين اوچونجو گونو، 1377- جی هجري گونش ايلي ( 24 دسامبر 1998 ميلادي ايل )، اؤز سئوَنلرینی درین ماتمده غرق ائده‌رك تورپاغا تاپشیریلدی!
دوکتور زهتابی‌نین وفاتی شوبهه‌لی اولدو، چونکو او زامانلار «قتلهای زنجیره ای» آدی ایله مشهور اولان ناجوانمردانه قتل‌لر زامانی ایدی؛ دوکتور زهتابینی شبستر اوُتوبوس تئرمینالیندان ائوینه چاتدیران تاکسی سوروجوسو سوْنرالار دئمیشدی:
«پروْفئسور زهتابی‌ني من تئرمینالدان ائوینه آپاردیم. اوُستاد زهتابی سحر چاغی اوُتوبوسدان یئره یئندیکدن سوْنرا من اوْنو تاکسی‌یه میندیردیم؛ من بیر تاکسی سوروجوسو اوْلاراق اوُستادی ائوینه چاتدیرماق ایسته‌دیم، اوْ منی تانیماسادا من اوْنو یاخشی تانیییردیم. اوُستاد تاکسی‌یه مینمَکده چوْخ احتیاط ائدیردی! هاوا یئنی‌جه ایشیقلانمیشدی، هله شهرده ماشین گل-گئدی چوْخ آزیدی، دوکتور زهتابی مندن سوْروشدو : اوْغلوم سن کیمسَن،کیملردَنسن؟ آدیمی دئدیم. اوُستاد دئدی : سن چوْخ جاوانسان و من سنی تانیمیرام، آتا و باباوین آدی نه دیر؟
هر ایکیسي‌نين آدینی دئدیم. اوُستاد هر ایکیسینی تانیدی، سوْنرا تاکسی‌یه میندی!
اونو تک یاشادیغی ائوي‌نين قاباغینا قدر آپاردیم. اوْ چوْخ ساغلام ایدی …لاکین اوْ گونون صباحیسی خبر یاییلدی کی: دوکتور زهتابی ….! چوْخ تعجب‌لندیم، اینانا بیلمیردیم …! »


سایین حسن راشدی نین فیس بوک صفحه سیندن آلینمیشدیر

Comments: 0

رفتن به نوارابزار