آذربایجانین قایغیلاری و گئچیش دونمی یونتیم قونسئيی/ دکتر فرزاد صمدلی

آذربایجانین قایغیلاری و گئچیش دونمی یونتیم قونسئيی
ایکی هفته اونجه «گئچیش دونمی یونتیم قونسئيی» (شورای مدیریت دوران گذار/ قیساجا شورا) ایران رژیمی نین سابوتاژلارینا رغما، لوندرادا اوز سیاسی وارلیغینی اعلان ائتدی.
من فرزاد صمدلی، میلی حرکتین ان اسکی اویه لریندن بیری اولاراق، شورانین قوروجو اویه لریندن بیریسی یم و شورادا ائتنیکلری و اوزللیکله تورکلری و آذربایجانلی لارین گوروشلرینی تمثیل ائتمه یه چالیشیرام. شورانین گنل باشقانی سایین مهندس حسن شریعتمداری، آیت الله العظمی شریعتمداری نین اوغلو دور. بو شورا اونلارجا چوخ دگرلی و تانینمیش اوزگور، چالیشقان و مترقی دوشونجه یه صاحیب اولان اینسلارین بیرلشمه سی نتیجه سینده، بویوک اولایلارا حامیله اولان کثیرالمله ایرانین سینه سیندن جوشموشدور.
بو ایکی هفته ایچریسینده مینلرجه یازی و سویله شی، شورا و شورانین عضولری حقینده یایینلانمیشدیر. آدی چکیلن یازیلاری اوچ کاتاقوریده صینیفلاندیرمامیز موموکوندور :
۱/ شورایی تانیان و دستکله ین،
۲/ شورایی تانیمایان آنجاق شورایا صمیمت ایله باخان،
۳/ شورایی تانیان آنجاق سون درجه چیرکین و سالدیرقان بیر اوسلوب ایله شورایا سالدیران حقیقی و حقوقی شخصیتلر و شخصلر.
اگرسه سون دان باشا دوغرو گلمک ایسترسک، ان چوخ سالدیریلار، ایران رژیمی، رویالیست (سلطنت طلب) و بعضی سول دوشونجه سی ایله تانیان کیمسه لر طرفیندن گلمیشدیر.
بو قوروپلار شورایی آشاغیداکی قونولاردا سرت و چیرکین بیر شکیلده سوچلامیشدیر:
۱/ آنادیلین تحصیلی و آنادیلده تحصیل
۲/ فدرالیزم
۳/ ائتنیک حقلرینین تانینماسی
۴/ فرقلی گوروشلرین بیر شمسیه آلتیندا ییغیشماسی
۵/ سایین شریعتمداری و بعضی باشقا عضولره قارشی شخصی سالدیرلار.
 
عزیز دیلداشلاریم و حورمتلی آرخاداشلاریم،
بو سالدیرقانلار فارسجایی گلمیش گئچمیش ان اوستون دیل اولاراق گورومکده لر. بونلارین گوزونده فارسجا ایرانین سمبولودور و بو اولکه ایستر ایسته مز فارس قومیتی ایله برابردیر. بو بویوک یالنیش و درین جهالت بو قوروپلاری، فاشیستلیک درجه سینه قدر دوشورموش و ۱۹ جو یوز ایلین استعماری و استثماری دوشونجه لرینه قدر گئرییه گوتورموشدور. حال بو کی بیر دیلین ایران گیبی کثیرالمله بیر اولکه ده سمبول حالینه گلمه سی فوق العاده یالنیش دیر واساسا مترقی دونیادا دیل اولکه نین سمبولو دییلدیر. بلکی مثلا اینسان حقلری بیلدیرگه سی فرانسانین ان یوکسک سمبولدور، آمریکانین آنایاساسی بو اولکه نین ان بویوک گوسترگه سی دیر و آووستوریانین (اطریشین) موسیقی سی بو مملکتین گوز ببگی دیر. ایتالیادا هنر، آلمانیادا فلسفه و ژاپونیادا تکنولوژی ده عینی اوزللیگی داشیماقدادیرلار.
آیریجا اگرسه شورانین سندلرینده فدرالیزم لفظی نین یئرینه «اونیتر یاپی» یادا دسنترالیزاسیون (عدم تمرکزگرایی) سوزجوگو ایستیفاده ائدیلمه میشدیرسه آنجاق بو قوروپلار آرد آردا، تجزیه کلمه سینی وورغولامیشلاردیر. حال بوکی فدرالیزم تجزیه دييل و اساسا میلی وحدتی قوروماق ایچین دونیادا کثیرالمله اولکه لرده ان یاییغین و ان زنگین و انگین بیر سیاسی و ایقتیصادی ایداره طرزیدیر. اونوتمایاق کی ایستیقلالچیلیق بئله، سیاسی بیر حقدیر.
بو قوروپلار، چوروک و بوزوک بیر باخیشلا، کلاسیک بیر دوشونجه دوغرولتوسوندا، گلجک ایرانین گوزونو، قولاغینی و آغزینی بوتون مدرن و اینسان حاقلاری ایله دولوپ داشان اوزگور دونیایا قاپاتماق ایسته مکده لر. بونلارین ایستکلری اولکه یی ۱۹ جو یوز ایله گئری قایتارماقدیر. بونلارین ایستکلرینه قارشی توم گلیشمیش و مترقی اینسانلارین و دوشونجه لرین بیرلشمه سی گره کیر.
سالدیرقان قوروپلار فرقلی گوروشلرین بیر شمسیه آلتیندا ییغیشماسی نی دا جهالت و حتی حسادت ایله قضاوت ائتمکده لر. شورانین اساس دگرلرینی قبول ائدن هر شخص و هر شخصیت، شورانین عضوی اولابیلیر. بو چوخ گلیشمیش بیر دوشونجه و بیر سیاسی داورانیش طرزیدیر. دئمک بوردا قاپیلار هر سیاسی شخص و شخصیتین اوزونه (جینایت ائدنلر خاریج) آچیقدیر.
مهاجیملر سایین مهندس حسن شریعتمداری نین اوزونه و مرحوم آتالارینا سالدیرماقدالار. حال بوکی مهندیس شریعتمداری دونمین ان آچیق گوروشلو و ان درین دوشونجه لری سیاستچیلریندن بیریدیر. آیریجا مرحوم آیت الله العظمی شریعتمداری، آیت الله خمینین قورخونج ولایت فقیه ماده سینه قارشی قیام ائدن و خلقی مسلمان قوروپونو اولوشدوران و ائتنیک حقلرینی و اوزللکیه تورکلری و آذربایجانلیلاری ساوونان ایلک جسور و قهرمان شخصیت و ایلک مترقی آیت اللهدیر و بو یولدادا جانینی بئله قویموش و آجیلار و ایشکنجه لر ایچینده شهادته اوغرامیشدیر.
 
عزیز میلی حرکت عضولری و چالیشانلاری،
بیر چوخ یازیلارینیزدا و خصوصا زحمت چکیب منه گوندردیگینیز سایسیز مساژلارینیزدا، سیزین تبریکلرینیز و محبتلرینین ایله بیرلیکده چوخ درین قایقیلارین اولدوغونو گوردوم و انلادیم.
چوخ حقلیسنیز.
منجه پارک اتابک فاجیعه سیندن سونرا آذربایجان گئچن یوزایلده «طهران»ین و «تهران»ین خسته سیاستلری ایله اوز به اوز قالمیشدیر. اعتمادسیزلیگ یوکسک بیر درجه ده دیر. بویوک کدرلر و دردلر ایچینده بوغولموش بیر توپلوم اولاراق یاشاماقداییق.
من اوزوم روسلارین گونئی آذربایجانا سالدیرسینی و قتلی عامینی، جیلولوق سوی قیریمینی، پارک اتابک فاجیعه سینی، بولشیویکلرین شمالی آذربایجانا حمله سینی و قتلی عامینی، قاقفازداکی مسلمان سوی قیریمینی، آزادیستان اولایینی، ۱۹۴۵ده میلی دولتین ییخیلماسینی و تهرانین آجیماسیز سوی قیریمینی و اینقیلابدان سونرا خمینی نین آذربایجانداکی قتلی عامی نین آجیسینی قلبیمده توتاراق یاس ایچینده یاشایان بیر اینسانام.
شوکورلر اولسون کی تورک و اذربایجان میلتی یارالی اولسا دا هله دیمدیک آیاغدادیر، چالیشماقدادیر و گونو گوندن داها چوخ گلیشمکده دیر.
 
عزیز دوستلاریم،
تاریخی اونوتماماق گره کسه ده، تاریخده ساپلانیب قالماق بویوک بیر یالنیشدیر. هر ۲۰ ایلده یئنی بیر نسل اورتایا چیخماقدادیر. بو نسل اونه باخاراق ایلرییه دوغرو یورومک ایستر.
منجه شورا بولگه سل و محلی قوروپلار و پارتیلار خاریج، ایران ساحه سینده و چاغداش ایران تاریخینده ائتنیک حقلرینه چوخ اونم وئرن و دیقت ائدن ان ایلریجی بیر تشکیلاتدیر.
 
البته، منیم شورادان ایسته ییم داها چوخ دور.
منیم گوزومده ایران ائتنیکلری گونوللو بیر فدرال یاپی چرچوه سنده بیرلشیب تماما برابر و ائشیت حقلرله یاشاماقدا اولمالیلار.
منیم نظریمده فارس دیلی تک گنل رسمی دیل اولابیلمز. اوبور دیللر و اوزللیکه تورکجه حتما رسمی اولمالیدیر.
بونلار منیم گوروشومدور و شورانین گوروشلری، اساس دگرلر سندلرینده یازیلمیشدیر.
 
آنجاق چوخ دگرلی دوستلار،
بو دوشونجه لر بیر مترقی توپلومون تاسیسی ایچین سادجه یوزده ۲۰ لازیملی اساسلاردیر.
منجه عدالت و قانون اوستونلوگو، اینسان حقلری، سکولاریسم، اولوسلار آراسی حقوقا سایغی، دمکراسی، اوزگورلوک، ایقتیصادی رفاه، یوکسک درجه ده تعلیم و تربیت، هونره توجه، جنسیت و جنسی برابرلیک، چئوره یی قوروماق، پولسوز درمان، ایش قورماق، ایجتیماعی سورونلارا قارشی باشاریلی بیر موجادیله وئرمک … کیمی چوخ چوخ اونملی باشقا فاکتورلار دیقته آلینمازسا آذربایجان سهلدیر، آمریکا توپلومو بئله چوکر و یئرله بیر اولور.
 
چوخ سایغی دگر تورک و آذربایجان ملتی،
دیقتینیزی اشاغیداکی اوچ جومله یه چکمک ایسته ییرم؛
۱/ مشروطه آنایاساسیندا و باشقا بیر دئییشله قاجار و پهلوی دونملرینده رسمی دیل ماده سی یوخدور.
۲/ ایران ایسلام آنایاساسیندا فارسجا رسمی دیلدیر و ۱۵ نجی اصلده ائتنیک لرین دیل حقلری تانینمیشدیر.
۳/ ایراندا ان آز ۵۵ میلیون غیر فارس و ان آز ۳۵ میلیون تورک یاشاماقدادیر.
سوال:
بو ماده لره دیقت ائدرسک ندن رضاشاه، محمدرضاشاه، ایت الله خمینی و آیت الله خامنه ای دونملرینده ائتنیک حقلری و دیللری هيچ بیر زامان دیقته آلینمامیش و اگر آلینمیشسا دا ایجرا ائدیلمه میشدیر؟!
منجه قومیتلر و خصوصا تورکلر اوز میلی ایسته کلرینی بیلیدیگیمیز هر مشروع یول ایله و بوتون قوتله اورتایا قویمامیشلار. بیر گون بو بویوک گوج اورتایا قویولورسا ایرانین دونوش نوقطه سی اولاجاق، تاریخ یئنی دن یازیلاجاق و گلجک ایران اساسدان دگیشیله جک.
پارتیلر و حزبلر گلر گدر. قالیجی میلتدیر و سادجه میلتدیر. میلتین ایسته گی اولور و اولمالدیر. «گئچیش دونمی یونتیم قونسئيی» (شورای مدیریت دوران گذار) میلتین محصولو و اورونودور.
ائتنیکلرین و تورکلرین مشهود ایقتیدارینی دمکراسی و اینسان حاقلاری ایله بیرلیکده ایرانین هر بیر یئرینده گوسته ره رک، محض مخالیفتدن چیخاراق و یاردیملاشاراق، داغلاری یئریندن اویناتابیلیریک.
دکتر فرزاد صمدلی/ واشنگتون/ ۱۱ اکتبر ۲۰۱۹
رفتن به نوار ابزار